《空姐空少常遇見的沒營養提問》其之二
「你識唔識A某某？佢都係你公司做空姐/空少。」
其實呢個問題即使唔係空姐空少都經常性會被人問及。朋友們會嘗試互相了解對方的工作背景藉此尋找共同話題。當聽到你公司的名字時，對方的大腦便會馬上搜尋一切關於這間公司的資訊，包括其他同在這間公司工作的朋友。其心理等同係facebook 睇下大家有無mutual friend。只不過...一間航空公司有咁多個空姐空少，尤其我地公司有成9000個咁多，你以為我係工作上會遇到並認識到你另一個朋友嗎？其實真係「沒那麼簡單」。曾經有班機個啊姐話飛左12年，都未見過同機的客艙經理。大家係同一間公司同一部門同一team做左12年都從未見過對方。無錯係12年！即係十二生肖都循環左一圈，即係如果生左小朋友都夠期幫小朋友換兒童身份證。12年間可以發生好多事情，但係上天始終無安排呢兩個同事係12年內相遇。
當然，即使唔相遇，都有可能聽過A某某的尊姓大名。一個人出名，不外乎兩種原因。一係名揚四海，一係臭名...俗語有云：「好事不出門，醜事傳千里。」如果你同A某某真係朋友的話，我估你未必想我詳細解釋點解我會聽過A某某的大名。
最後，假設我真係認識A某某，然後你得到「我認識。」呢個滿意的答案後，我地之間的話匣子都係無打開過。除非你一開始便打算跟我大聊A某某的是非或者生平事蹟等。
所以，呢個問題我會視之為又一沒營養提問。如果你真係好想知我識唔識A某某，請直接移玉手search下我地mutual friend list上面A某某是否榜上有名。另外，如果我答左你唔識呢個人時，你可以十二年後再試下問多次。
Search